A touz ceuz qui ces lettres verront, Nicolas Gascoing, clerc, garde du seel de la prévosté de Vernon, saluz : Sachiés que par devant nous furent présens Johan Martel et Alaire, sa fame, de la paroisse de Heubecourt, si comme il disoient, et recognurent que il avoient vendu, quitié et délessié, à touzjours, par non de vente, à hommes relegieux, l'abbé et le couvent des Vaux de Sarnay, demie acre de terre assis en ladite paroisse, entre les diz relegieux, d'une part, et Pierres de Tourny, d'autre, pour chinquante souz parisis, à tenir, à avoir et à pourseer, par droit héritage, la vente dessus dite au diz relegieux et à lour successeurs, franchement, quitement et em pes, par quatre deniers parisis, rendans chascun an à la Gonée, le dyemenche des Brandons, sanz nulle réclamance desdiz vendeeurs ou de lour hoirs à fere desoreenavant, par reson d'éritage, de douaire ou de mariage encombré, ou par autre reson, quele que elle soit ou puist estre. Et promistrent et jurèrent, etc.....

En tesmoing de laquele chose, nous, à la requeste des parties, avon seelé ces lettres du seel de la prévosté de Vernon, sauf le droit le roy et l'autrui. Ce fu fet l'an de grace mil II^e nonante et huit, le dyemenche que l'en chante Occuli mei.