A touz ceus qui ces présentes lettres verront, Jehan de Montegni, garde de la prévosté de Paris, salut : Nous faisons à savoir que par devant nous vint en propre personne monsegneur Jehan de Sarnoi, chevalier, et afferma en droit qu'il avoit, tenoit et poursuivoit près de la ville de Sarnoi vint et sis arpenz de terres en deus pièces, mouvanz du fié monseigneur Gui de Chevreuse, chatelain de Neaufle, dont l'une pièce tient au chemin de Champ-Houdri, d'une part, et d'autre part, par devers le chemin de la Maladerie, et à une autre part, à la terre de monsegneur Jehan devant dit, si comme les bournes le devisent ; et l'autre pièce tient au courtil de la Maladerie de Sarnoi, d'une part, et au bois de l'Ospital et de la Boissière, d'autre ; et que en ces deus pièces de terre contenanz vint et sis arpenz, il avoit toute joustice, grant et petite, haute et basse, si comme il disoit. Lesquiex vint et sis arpenz de terre devant diz, avesques le droit et la joustice qu'il i a, sauf et retenu à soi et à ses hers et à ceus qui auront cause de lui l'exécution de la haute joustice, le pendre et le coper de l'orille quant le cas avendra, il reconnut par devant nous lui avoir vendu et en nom de pure vente quité et otroié à touz jours, avesques touz les arbres, les murs et les pierres qui sunt en closel dedenz ladite pièce de terre qui tient au chemin de Champ-Houdri, en manière que ledit monsegneur Jehan doit avoir, si comme il disoit, la moitié de toutes les issues de l'année présente, et deus arpenz dont il aura toute la cuellierte, si comme il disoit, à religieus homme, l'abbé et le couvant des Vaus de Sarnoi, et à leur église, et à leur successeurs, et à ceus qui auront cause de eus, pour sis vinz dis sept libres et dis solz de parisis, etc..............................

Et promist qu'il rendra et paiera as religieus ou à ceus qui auront cause de eus vint sept libres et dis sols de parisis, en nom de pene, se la vente estoit retraite, avesques touz autres coustemenz, mises, déperz et despens qu'il auraient et feroient pour défaute de sa garantize, sur lesquiex il promist à croire sus le simple serement du porteur de ces présentes lettres, sanz autre preuve faire ou requerre. Et avesques ce, il promist que dedenz quinze jours il fera et procurra que Jehan de Sarnoi, escuier, son fuiz, voudra, loera, gréera, otroiera ceste vente et s'en fera et establira garantisseur, et en donrra lettres as religieus, seellées du seel de la prévosté de Paris, en la melieure fourme qu'elles pouront estre faites. Et après ce, vint pardevant nous monsegneur Gile de Claagni, chevalier, et se fist et establi pardevant nous pleges et principal garantisseur et acomplisseur de toutes les choses devant dites entériner et acomplir en la manière et en la fourme qu'il est dit desus, sanz enfreindre en aucune chose ; et pour droite garantize porter et toutes les choses devant dites entériner et acomplir en la manière qu'il est dit desus, il obligèrent eus et leur hers et touz leur biens et les biens de leurs hers, meubles et non meubles, présenz et avenir, où qu'il soient, à jousticer par nous et par noz successeurs ou par la joustice souz qui il seront trouvez, et espécialment ledit monsegneur Jehan de Sarnoi toute sa terre de Sarnoi et tout ce qui i appartient, pour vendre et pour despendre, à tel fuer, tele vente juques à tant que tout soit acompli et entériné ; et renuncèrent, etc...... En tesmoing de ce, nous avons mis le seel de la prévosté de Paris en ces lettres, l'an de grace mil CC. quatre vinz et onze, le jour de la feste sainte Croiz en may.