A touz ceus qui ces presentes lestres verront et orront, Pierres Malet, prévost de Vernon, salu en Nostre Seigneur : Nos vos fesons à savoir que par devant Guillaume de Sorignisà cel tens baillif madame la Reine2, et par devant plusors chevaliers, et par devant nos, Nichole du Moulin délesa et quita et du tout déguerpi en plaine asise à Richart de Seint Michiel et à Jehen Poupart et à Guillaume le Maignien trestout icelui tenement, lequel eschei audit Nichole de la mort feu Pierre du Moulin, frère à icelui Nichole, en terres, en vignes, en mesons, en rentes et en autres choses en conques lieu qu'il soient, c'est à savoir par la reson d'une plegerie de laquele les devans nommez Richart, Jehen et Guillaum estoient pleiges pour ledist Pierres du Moulin, frère audit Nichole, envers madame la Reine ; en laquel pleigerie devant diste les devans nommez Richart, Jehen et Guillaume encoururent et mout de damages i ont eu et dépens ; et pour lor délivrance de ladiste plegerie, les devans nomez Richart, Jehen et Guillaume, du consentement et de la volonté dudit Nichole et de ces hers, ont vendu et otroié as hommes relegieus, à l'abé et au couvent des Vaus de Sarnai XI deniers et une poitevine parisis d'anuel rente ; lesquiex les devans nommez relegieus devoient chascun an audist Pierres, en la feste seint Remi, d'une meson en laquele Guillaume Galois maint, laquele est asise en la boucherie de Vernon, entre la meson Jehen Tropcras, d'une part, et la meson Robert de Seint Marcel, de l'autre part, à tenir, à avoir, à pourseer et à retenir à touzjours les devans nommez XI deniers et poitevine parisis d'anuel rente au devans nomez relegieus et à lour successours, franchement, quitement et pesiblement, sanz aucune réclamance dudist Nichole ou de ces hers à fere desore en avant ; pour VI sous parisis lor quites, lesquiex les devant nommez Richart, Jehen et Guillaume resurent présentement des devans nommez religieus, et desquiex il se tindrent pardevant nos pour paiez ; et promit et jura ledist Nichole du Moulin sus les saintes euvangiles, de sa bonne volenté et sanz contraignement, que encontre ceste vente et ceste otréance et ceste quitance, par la reson de héritage ou par aucune autre reson, par lui ou par autre, ne vendra, sauve la droiture au chief seignours. En tesmoingnage de laquel chose, nos avons mis le seel de la prévosté de Vernon à ces présentes lestres, à la requeste dudit Nichole el des devans nommez, de Richard, de Jehen et de Guillaume ; et à la confermance et à la seurté dudit Nichole, hoir à icelui Pierres du Moulin, icelui Nichole a mis son seel à ces présentes lestres ovec le seel de la prévosté de Vernon. Ce fu fet en l'en Nostre Seignor M CC LXXIIII, el jor de mardi devant la feste de la Décolation seint Jehen Baptiste.