A touz ceus qui ces lettres verront, Jehan de Saint Liénart, garde de la prévosté de Paris, salut : Nous fesons à savoir que par devant nous vint Jehan, dit de Maante, donna, quitta, otroia et délessa, et recognut et confessa en droit lui, de sa bonne volenté et de sa certeinne science, avoir donné, quitté, otroié et délessié desorendroit, à touz jours perpétuelment, par don fet entre les vis, sans espérance de james rappeler, à religieux hommes, l'abbé et le couvent des Vaus de Sarnoy, à leur église et à leur successeurs en icelle, pour Dieu et en non de pure et perpétuel aumosne, et pour le remède et le salu de s'ame, de son père, de sa mère et de touz ses autres amis, et pour estre és prières et és bienfez de ladite église, desdiz religieus et de leur successeurs, et pour avoir sa sépulture ou cimetière de ladite église, une pièce de vingne, contenant demi arpent ou plus, que il avoit et tenoit, si comme il disoit, assise ou terrouer de Marli-le-Chastel, ou leu que l'en dit Plain-Champ, entre la vingne Vincenot de Maante, son neveu, d'une part, et la vingne Jehan la Caille, d'autre, à quatre deniers et maille de cens, renduz au seingneur de Marli, és huictiesnes saint Denis, tant seulement, si comme il disoit, retenu dudit Jehan son usfruit en ladite pièce de vingne tout le cours de sa vie tant seulement, si comme il disoit : transportant et mettant, etc............... En tesmoing de ce, nous, à la requeste dudit Jehan, avons mis en ces lettres le seel de la prévosté de Paris, en l'an de grace mil deus cenz quatre vinz et seize, le samedi devant la saint Père, ou mois de février. 1 « Gilot.