Universis presentes litteras inspecturis, officialis curie Parisiensis, salutem in Domino : Notum facimus quod Guillelmus, clericus, filiusquondam defuncti Luce de Cimiterio, dedit et concessit, donatione inter vivos, religiosis viris abbati et conventui Vallium Sarnaii, in perpetuum, quoddam arpentum terre site, ut dicitur, apud Athies, in loco qui dicitur Fossa-Supra-Limitem, in censiva ecclesie Beati Maglorii, ad duos sextarios vini, quemdam boisellum avene et obolum annui redditus, ut dicebant. Item quarterium quoddam vinee site, ut dicitur, in clauso, in censiva Johannis Asnerii, clerici, ad quatuor denarios, ut dicitur, censuales. Item tria quarteria terre, site in campo qui dicitur Aquaticus, in censiva Johannis de Bellomonte1, ut dicitur, ad sextos denarios, ut dicitur, censuales. Que omnia sita sunt apud Athies, ut dicebat. Promisit enim dictus Guillelmus, etc.........................

Johannes vero, dictus de Cimiterio, frater dicti Guillelmi, donationem et concessionem predictas voluit et concessit, et quitavit predictis abbati et conventui in perpetuum quicquid juris et dominii habebat et habere poterat in rebus collatis, ut dictum est, superius annotatis, jure hereditario vel alio quoquomodo ; promittens idem Johannes, etc.........

Promisit insuper idem Johannes, sub religione prestite fidei, se effecturum, curaturum et procuraturum quod Philippus de Cimiterio, laicus, frater ipsorum Guillelmi et Johannis, et Petronilla, soror dictorum fratrum, premissa omnia et singula rata habebunt et grata, et quictabunt per fidem res predictas in perpetuum abbati et conventui supradictis. Datum anno Domini millesimo ducentesimo quinquagesimo, mense novembri, die martis post festum beati Martini hiemalis.