A tous ceus qui ces lettres verront et orront, Lucas, chapelain de la chapelle du chastel de Vernon, garde du seel de la prévosté de icelle ville, salut : Sachiez que par devant nous furent présens Nichole le Tailleeur et Lice, sa fame1, et recognurent que il avoient vendu et otroié à hommes relegieus et honestes l'abbé et le couvent de Sernay une pièce de terre, contenant acre et demie de terre, assise en la parroisse de Saint-Martin de Tilli, entre la terre Pierres le Peletier, d'une part, et la terre qui fu Rabel le Blanc, d'autre, pour huit libres parisis, etc.......

Et en obligièrent, quant à ceu, en contrepleige, as dis religieus et à leur successeur, eus et leur hoirs, et espéciaument lour meson, assise en la parroisse Nostre-Dame de Vernon, entre la meson Aalis de la Fosse, d'une part, et la meson Guillaume Blanchart, d'autre ; et généraument tous ses autres biens, muebles et immuebles, présens et avenir, acquiz et acquerre, à prendre et à lever où il seront trouvez, pour tous les dommages asdis religieus et à lour successeurs restorer, value à value, toutes les fois que mestier en sera, se aucuns en encourront par la deffaute de la garantie desdis vendeurs ou de leur hoirs. En tesmoig de laquele chose, nous avons mis le seel de la prévosté de Vernon à ces présentes lettres, à la requeste des parties ; sauf le droit le roi et l'autrui. Ce fu fet l'an de grâce mil CC IIII^xx et quatorze, le samedi après Letare Jherusalem.