Philippus, Dei gratia, Francorum rex : Noverint universi ad quos littere iste pervenerint, quod, cum abbatia beate Marie de Haubecort, de donatione Gachonis de Torote, quamdam terram haberet juxta quamdam granchiam monachorum beate Marie de Valle Sarnaii, consilio prudentum virorum facta cum predictis monachis commutatione, ipsi monachi pro predicta terra dederunt abbatie de Haubecort in molendino de Vileta sexsextarios bladi, scilicet tres unius et tres alterius, que de jure spectabant ad predictos monachos ; abbatia autem de Haubecort diu tenuit predictum bladum libere et quiete ; propinquiorem vero et utiliorem redditum sive aliam quandocumque cupientes comparare hereditatem, predictos sex bladi sextarios, communi assensu sui capituli, domui elemosinarie Medunte pro duodecim libris vendidit ; fratre Daniele, predicte domus tunc temporis priore. Quia vero predictum molendinum erat Odonis de Vilarceaus, ad petitionem ejusdem Odonis, id confirmamus ; ita quod si ipse vel heres ejus qui molendinum tenuerit, impediret bladum hoc reddi predicte elemosinarie Medunte, ille qui habuerit domum predictam in custodia, poterit super hoc conqueri in curia christianitatis. Si vero per censuram ecclesiasticam non posset cogi ad solutionem predicti bladi, custos predicte domus tunc nobis posset hoc dicere, et nos faceremus id reddi. Actum apud Meduntam, anno Domini Mº Cº nonagesimo octavo, mense februario.