Omnibus presentes litteras inspecturis, soror Agnes, dicta abbatissa Sancti Antonii Parisiensis, totusque ejusdem loci conventus, salutem in Domino : Noverint universi quod nos, pensata utilitate domus nostre, duodecim arpenta terre arabilis continua vel circiter, que habemus in parrochia de Sancto-Ferriolo, tradidimus viris religiosis abbati et conventui Vallium Sarnaii, a festo sancti Remigii proximo venturo usque ad duodecim annos1, quodlibet arpentum sub annuo censu triginta denariorum parisiensium nobis, singulis annis, in festo sancti Remigii, persolvendorum ; que quidem duodecim arpenta libera sunt et quitta ab omni honere et costuma preter decimam consuetam. Dicti vero religiosi tenentur nobis restituere terram nostram predictam in eque bono statu, sicuti modo est, completo termino predicto, nisi forte de nostra et ipsorum voluntate prefatum terminum contigerit prorogari. Insuper notum facimus quod nos eisdem religiosis tenemur in viginti solidis parisiensibus annuatim, quos habent et habere debent, per manum nostram, in pedagio de Essona, ex dono bone memorie domini Ferrici, dicti Beliart, militis ; quos viginti solidos in solutione dicti debiti, in quo nobis tenentur pro terra antedicta annis singulis, volumus computari. Quod ut ratum permaneat, sepedictis religiosis presentes litteras sigillo nostro dedimus sigillatas. Actum anno Domini millesimo ducentesimo LXº sexto, mense junio.