Omnibus presentes litteras inspecturis, nos Johannes de Bosco-Geraumi, miles, et Agnes, ejus uxor, salutem in Domino : Noveritis quod cum nos recepissemus, singulis annis, sex solidos parisienses et unum caponem cum dimidio annui redditus et capitalis census a religiosis viris abbate et conventu Vallium Sarneii, de duabus peciis terre, quas in feodo nostro tenebant et tenent, sitas in parrochia de Hericuria, quas dictis religiosis contulit in elemosinam Johannes Anglicus de Heules1, quarum una pecia sita est inter terram Droconis de Cauda-d'Aez, ex una parte, et terram prioris et conventus de Salicoza, ex altera ; et altera pecia sita est inter terram dictorum religiosorum, ex una parte, et terram Guillelmi de Gyverni, ex altera ; et voluissemus quod dicti religiosi dictas duas pecias terre alienarent seu ponerent extra manum mortuam et extra manum suam : tandem nos, habito super hoc tractu diligenti, de communi assensu nostro et voluntate, vendidimus et concessimus in perpetuum dictis religiosis dictum caponem cum dimidio. Concessimus etiam dictis religiosis quod ipsi dictas duas pecias terre de cetero habeant et teneant in perpetuum, in suos proprios usus, pro sex solidis parisiensibus annui redditus, nobis a dictis religiosis annuatim reddendis in festo Omnium Sanctorum. Pro hac autem venditione et concessione dederunt nobis dicti religiosi quadraginta solidos parisienses, quos inde presentialiter recepimus et de quibus tenemus nos pro pagatis. In cujus rei testimonium, sigilla nostra presentibus litteris digna duximus apponenda. Actum anno Domini Mº CCº LXXº tertio, in crastino beati Vincencii.